Click to listen highlighted text! Powered By GSpeech
Get Adobe Flash player
مستمرين معاكم من 2008 *** 2008-2023 **** #لان_لجيشنا_تاريخ_يستحق_أن_يروي **** ***** إنشروا تاريخنا وشاركونا في معركة الوعي **** تابعونا علي قناة اليوتيوب 1100+ فيديو حتي الان **** تابعونا علي صفحات التواصل الاجتماعي** أشتركوا معنا في رحلاتنا لمناطق حرب أكتوبر **** يرجي استخدام خانة البحث
  • تعريف بالمجموعة و أعضاءها

     مؤسسة مؤرخي مصر للثقافه ( المجموعة 73 مؤرخين ) المشهرة برقم 10257 لسنه 2016  المجموعه 73 مؤرخين ، مؤسسه ثقافيه للتأريخ والابحاث التاريخيه نشأت عام 2008 - وهي عباره...

    إقرأ المزيد...

بطل الشهر

بطل الشهر /  العميد يسري عمارة 

 

 

الــصـفـحـة الـرئيسيــة

عقيد / وحيد سعد الدين / سلاح الغواصات المصرية

بسم الله الرحمن الرحيم

( ومن المؤمنين رجال صدقوا ما عاهدوا الله عليه )

 

 

ستظل مصر تفيض فى كل الازمان وعلى كل العصور برجال قادرون على تحمل المسؤليه بكل صدق و امانه وعلى مر التاريخ يثبت رجال البحرية المصرية انهم ملوك اعالى البحار ورجال الصمت اصحاب الههم العالية .

الاسم : وحيد سعد الدين احمد

الرتبه : عقيد بحرى

-         مواليد سنه 1945 محافظه الاسكندرية برأس التين

المؤهلات :

بكالريوس علوم الدراسات البحريه 1965

ربان اعالى البحار 1973

دبلوم الدراسات العليا فى تشغيل الاسطول 1995

الخبرات :

قائد غواصه 6 سنوات

ضابط طوربيد غواصه 22 بحرب اكتوبر 1973

العمل على سفن اعالى البحار 15 سنه

قائد سفينه تجاريه 1986 – 1992

تدريس بالقوات البحريه 5 سنوات

الالتحاق بالاكاديميه العربيه للعلوم و التكنولوجيا و النقل البحرى 1986 – 2006

الوصول الى درجه مستشار رئيس الاكاديميه 2003

البحوث :

-         التلوث البحرى

-         سفن الحاويات

-         المعاهدات الدوليه لسلامه الارواح بالبحر

 

 

 

اسباب الالتحاق بالبحريه : هى تاثري الشديد وحبي للبحر وتم الالحاقي بسلاح الغواصات للقوات البحرية سنه 62 لانى كنت اعشق البحر واستمريت فيها الى ان وصلت قائد غواصه وتدرجت من ضابط طوربيد لضابط اول الى قائد غواصه واستمريت قائد غواصه حوالى 9 سنين

 

 

   كشف الهئية : اتذكر ان اللجنة كانت شديدة جدا وكانت تضم اسماء كبيرة معروف عنها الحزم والصرامة كانت تضم الله يرحمه الفريق محمد فوزى وكان مندوب البحريه الفريق سليمان عزت والطيران افتكر كان صدقى محمود .

واتذكر كان السؤال الاول هو لية عايزة تدخل البحرية وكانت اجابتى والله انا من اسكندرية وبشوفهم وعاجبنى منظرهم وعاجبنى شغلهم و شكل البدله البحرية وانا طول عمرى نفسى اعمل فى اسكندرية ما مخرجش منها لانى زى السمك ما بحبش اطلع من الميه .

وهذا كان ردى علي اللجنة لدرجة اننى عند خروجى قابلنى الضابط المسؤل عن دخولنا وكان برتبة رائد قال لى اعتبر نفسك راسب ، قولتله ان شاء الله ربنا يسهل لان من وجهة نظرة اننى اطلت فى الاجابه عليهم وقد كان يمتلكنى احساس باننى مقبول باذن الله لاننى لمحت الفريق سليمان عزت يبتسم ف استرحت نفسيا .

وقد كان ابى ضابط فى السواحل وكان يعمل مع اللواء وحيد شوقى ابن اخت النحاس باشا والله دخلت البحرية والحمد لله ربنا وفقنى وكنت من المقبوليين

 

وعن شكل الاختلاف بين الحياة المدنية و العسكرية

اولا انا كنت داخل الكليه البحرية لكن للاسف كانت البحرية بتروح تتدرب فى الكليه الحربية فى القاهرة و ليست هنا فى الاسكندرية لانة لم يكن فى الاسكندرية كلية بحرية فى هذا الوقت .      

وقد كانت دفعتى من اكبر الدفعات فى القوات البحرية 120 ضابط بحرى

و العدد فى العادى كان فى حدود من 60 او 70 وقبل كده كان بيبقى 30 او 40 فهذة كانت اكبر دفعه فى عهد الرئيس الزعيم جمال عبد الناصر حتى وقتنا هذا .

واننى اتذكر بعض اسماء زملائى فى الدفعة لاننا كنا بنتقابل كل سنه عندنا اجتماع للدفعه

وعن اشهر الاسماء اللى كانت موجوده فى الفتره دى ولا تنسى هو كان زميلى واول الدفعة محمود ابو عجيله ده كبير مرشديين فى هيئه قناه السويس ومشهور قوى فى القنال وايضا اللواء حامد فتوح وهو رجل استطلاع خلف خطوط وفيه زميله الله يرحمهم السيتاوى وكان راجل ممتاز .

-         هل تتذكر اول وحده اتلحقت بيها كانت ايه ؟

-         الغواصات انا لم اذهب الى غيرها

فالاول كان نظامنا الاتى : زمان كنا نقعد سنه نلف جميع الوحدات كل وحده شهر او اتنين لحد ما تقرر انت عايز ايه

لما نعوز بقى نقرر كانت الزياره كل الوحدات ماعدا الغواصات

لان الغواصات تحتاج الى ان تحصل على دورة 3 شهور لكى تعمل على الغواصه واحنا لم نحصل فى التدريب على دورة الغواصة فكنا لانذهب للحصول على هذة الدورة التى مدتها 3 شهور الا اذا هنعمل على الغواصة وهو دة السبب الى خلانى صممت انى اذهب لاكتشف الغوصة اللى ممنوع على اى حد يدخلها الا بعد الحصول على دورة الاول فذهبت حبا فيها وهى كانت من التحديات الهامة التى قابتلها فى حياتى .

ثم الحقت بسلاح الغواصات بعد تخرجى من الكليه ولم الحق بغيرة

بالرغم من ان والدى لم يكن موافق و قال لى يا ابنى صعبه والعمل عليها متعب و جامدة الا اننى كنت مبهور بيها و كنت حاببها بالرغم من خطورتها لكن حبى ليها خلانى بقيت نمره واحد فيها فى كل حاجه استمريت 7 سنين احسن قائد غواصه 3 سنين احصل على افضل غواصه كان معايا المدمرات بتلمع من النظافة ولنشات الزيوت دى تلمع الغواصات دى عمرها ما تلمع خلى بالك يعنى صعبه جدا انها تلمع تنزل الميه وتطلع طول العمر مصديه فكان عند حضور قائد القوات للتفتيش او الوزراة كنت احصل على نمره واحد فى كله

لقد تخرجت شهر يوليو عام 65 اى بعد 3 سنين .

وكان التدريب دائم و شاق جدا .

 

فكرتى عن الملك كانت جيدة لا مش وحشه هى الحاشية اللى فسده الشله اللى حواليه كانت فسده لكن هو كراجل كان يحب مصر وكان امين على مصر و الدليل على صدق كلامى النهارده لما بيكتبوا عن الملك بيكتبوا ان عهده كان كويس لم يكن وحش كان فاسد لنفسه .و بيذكروا ان دايما بريطانيا متحكمه

لانة لا يقدر عليها هو هى كانت متحكمه احتلال انجليزى هنعمل ايه ،و هو الزعيم عبد الناصر طرد الاحتلال ازاى بحرب خاسرنا فيها 3 مدن على خط القنال الاسماعلية و السويس و بور سعيد اتبهدلوا مما اثر على البلد وتراجعنا واستقصدونا

قرار الحرب مش حاجه بسيطه يعنى انت بتهد بلد وبتعلق ارواح ناس بكلمه ، وارواح ناس بتروح بكلمه . ماهو السادات لما اخد قرار الحرب انا فى عرفى ان احسن واحد مسك البلد دى هو انور السادات .

 

نكسة 67 :

احنا بالذات بعد 67 كنا حاسينه بألم جامد قوى وجع من اهالينا وحبايبنا الشعب المصرى مأقدرش ان احنا ماحربناش فى 67 لكن ذهبنا استطلاع عند حيفا جبت معلومات ورجعت لكن ما شفتش حد من بعيد بالمنظار بشوف والمح واكتب تقرير

وفى الفترة دى كنا بندرب تدريب شاق الاول قبل الحرب كنا بنطلع يوم فى الاسبوع يوم كل 10 ايام دلوقتى بقى بنطلع طوال ايام الاسبوع نرجع نعمل اعاده تجهيز ( ريفرشمنت ) للغواصه يعنى نزود الغواصه بالاكل والميه والصيانه ونصلح الموجود ونطلع تانى تدريب نقعد تحت الميه اسبوع نوع من التدريب معين فكان تدريب شاق جدا جدا

ذكريات النكسة :

و فى هذة الفتره كان الاحداث بالنسبة لنا مختلفة احنا طلعنا بره لكن للاسف ما حصلش حرب معانا ولا اى حاجه هما حبوا يهجموا على ميناء الاسكندرية طلعتلهم كاسحه اللى كان فيها اللواءعبد المجيد عزب ورمى الالغام وضربهم ( ديب شرز ) ودى قنبله بدائية جدا بس ربنا نفخ فى صورتها يعنى القنبله ديب شيرز حاليا فى دلوقتى صواريخ .

و قد كنت احصل على مأموريات مع مأموريات الشغل للتدريب لكن اهم مأمورية عندما استلمت غواصات سنه 82-83 من الصين و بعد ما تركت البحرية عملت فى الاكاديمية العربية للنقل البحرى محاضر

فى الاول عملت على السفينه عايده3 وسافرى لاستلام السفينه عايده 4 من اليابان وثم سافرت مأمورية مع قائد اللواء غواصات اللواء ياقوت الله يرحمه لاستلام غواصات من المانيا فسافرنا المانيا وهولندا لاستلام الغواصه ( دولفين ) التى جاءت حاليا للقوات البحرية للواء غواصات

 

 

الظروف ما بعد النكسه و سر تسميتكم بتوع البوتجاز

بعد النكسه كان بيتنا الوحده وتدريبات مكثفة وما نخرجش و كنا نشتغل 4 ايام فى الوحده ونخرج 5-6 ساعات البيت وممنوع نلبس لبس رسمى كنا بنلبس افرول ازرق حتى كان الناس مسمينا بتوع البوتجاز ايوه والله للاسف بقولك فى حاجات من الشعب المصرى كانت بتزعلنا بس بعد كده تفهمناهم وفهمنا ان ليهم حق لان الناس المدنيين ليست مثل العسكريين .

اجنا محاربناش فى 67 لكن لما جت الفرصة لينا فى 73 الحمد للة الجيش اثبت كفاءة وده ماكنش بالساهل بالمجهود والتعب وتحت ضغط معين نفسى وبدنى .

وكان قائد سلاح الغواصات هو اللواء على عبد الله صبرى فى فتره الستينات مسك فتره طويله راجل كان ممتاز وذكى وكفاءه عاليه جدا جدا قابلته شخصيا هو اللى امتحنى ومن بعدة اللواء ياقوت حسين ثم اللواء محمد على فاضل اخوه الفريق احمد فاضل اللى كان ماسك قناه السويس كل دول وكان اللواء على عبد الله صبرى يمتحنى فى الغواصة احنا كان عندنا امتحانين امتحان نظرى بعد الدورة وامتحان عملى كان يتركنى كذا شهر جوه الغواصه وثم يمتحنى فاجأة فى العملى يقولى مثلا تعالى وشغل اللمبه دى واللمبه دى ممكن تكون بتنور من تحت السلم وكان دوره سلاح الغواصات فتره النكسه مهمتنا الرئيسية استطلاع وقطع خطوط مواصلات العدو يعنى اى سفينه تجارية اضربها اى سفينه حربيه تخش المياه الاقليمية بتاعتى اضربها هى شغلتى فانا ذهبت احتليت منطقة عمليات عطوهالى تبقى قدامى على حدود المياه الاقليمية واى حد يعدى نضربه و لم نشتبك مع اى حد فى 67

 

 

بعد عام 67:

بدؤوا يكثفوا عمليات التدريب على مستوى القوات المسلحه بالكامل بما فيه طبعا احنا يعنى الاول كنا بنطلع يوم كل 10 ايام بعد 67 بقينا نشتغل اسبوع تحت الميه و نشتغل ليل نهار شغل مكثف للناس وتدريبات اللى مع الاخريين مع المدمرات مثلا لكى اضرب عليها طوربيد بس مش فعليه بقى هيكليه يعنى اديله عمق اكبر من عمق الغطس فتقوم تعدى من تحتيه يعنى انا كان فى تدريب بيان عملى كان حاضر فيه السادات وكنت انا ماسك كومندان اللى حيضرب على السادات الطوربيد طبعا بيختاروا اكفئ واحد عشان خاطر يبينوله ان بص الغواصه هى غرقتك كده تعتبر وانت فى المدمره فانا ضربت الطوربيد عدى من تحت ما هو قاعد بالظبط فى الكرسي بتاعه فى الممشي فقالولى اللى كان فى الممشي هناك لدرجه انه قام نط من ع الكرسى لان طوربيد جاى عليه من بعيد شايفه هو لان بيبقى غاطس 5 متر او 7 متر فشايف الفقاعات ( البابليز ) جايه عليه والطوربيد سرعته رهيبه 41 عقده فظاهر له الخط السير فنط من على الكرسي ، لذلك ارسل لى نوط شجاعة  وقتها و قال لى ( well den ) وتم حصولى نوط بناء على توجيهات سيادة الرئيس السادات عجبه التنفيذ

 

 

 

وشهد انها كفاءة عاليه جدا جدا يعنى نتيجه حسابات وخبرة انا ممكن اضربه يطلع قدام المركب فاطلاق الطوربيد على هدف معين لها حسابات مش كده وخلاص لا سيستم معروف بجهز الطوريبد وادخله جوه الانبوبه وفتح الانبوبه واجهز وادخلها الميه والعساكر يبقى واقف على الايد بتاعت الاطلاق وانا بعمل المسأله بتاعتى فى القياده مع ضابط الملاحه وعندى كمبيوتر طبعا مش زى دلوقتى لا كان عبارة عن منافله قديم قوى وكبير جدا عشان يعمل مسأله بسيطة مش زى بتاع دلوقتى كده اللى فى الغواصات دلوقتى كمبيوتر عادى يتعامل مع 70 او 100 مركب انا كنت بتعامل مع مركب واحده بس واعمل المسأله اللى انا مدرب عليها فى غرفه التدريب بره وانفذ ، ما بين تحديد الهدف واطلاق الطوربيد والامر لا يتعدى من ربع ساعه لنص ساعه بالكتير يعنى اسرع واحد ربع ابطئ واحد نص ساعه مش كتير ماهو كمان ماتنسيش المركب كمان ماشيه بسرعتها انا باخد المركب فى نقطه معينه والمسأله تقولى حتضربه فى نقطه معينه انا اضرب من عندى يكون هوا ماشي كدا ويقابل الطوربيد ما النظريه ايه مركب ماشيه بسرعه مثلا نقول 30 عقده والطوربيد حيمشى ب40 عقده والمسافه بيى وبينه 8 ميل مثلا فلازم اعمل مثلث حيتقابل فى نقطه معينه لو ماشى بدرى حيعديه اتأخر حيبقى وراه فيبقى زى قلته فلازم احسبها صح ف هذة كفاءة كومندان مع قمه تدريب .

وفاه عبد الناصر

خطاب التنحى ده احنا كشعب مصرى عاطفى يعنى أثر فينا وماتنسيش ان ده اول رئيس احنا نعرفه مكناش نعرف رئيس انا عاصرت العهد الملكى كله وابويه كان فى العهد الملكى وكنت صغير وقتها فى اعدادى ولان والدى كان وفدى والوفد كان الحزب الحاكم تقريبا و كان معايش واحد خاله النحاس رئيس وزارة وكنا برضه بينوبنا من الحب جانب اه انا عايز اقولك النحاس ده كان الوفد والنحاس باشا كان راجل جامع ماكنش وحش كان مخلص للبلد النحاس بالذات وسراج الدين الجماعه دول بتوع الوفد كانوا كويسين مش وحشين .

هناك تحفظ على شخصيه عبد الناصر

( العصابه اللى كانت بتتحكم فى البلد هو ساب البلد لكام واحد مثل شمس بدران وعلى صبرى ! ازاى يتحكموا فى البلد ؟ ولم يكونوا ينفذوا تعليماته كمان ولا كانوا بيسألوا فيه وعبد الحكيم عامر خرب الدنيا فيه واحد وزير دفاع يطلع الجو ويقولك ماحدش يضرب الطيران عشان انا فوق ، فوق ايه ؟ لا والانسحاب اللى عمله ده بدون مخطط ولا كان عاطى خطه انسحاب للجيش كله كل واحد ينسحب حسب مزاجه فحصلت هرجله وفركشه فى صفوف العساكر حرام يعنى لهذا بقول ان الجيش لم يحصل على فرصته لا فى الحرب لا فى الانسحاب ) .

لهذا عندما تولى السادات رحمه الله عليه شعرت بتغير فى اسلوب ادارة القوات المسلحه اه بالطبع شعرت ان فيه رئيس فاهم بلده وفاهم القوات المسلحه وبيدى تعليمات وبيدى قرارات وبيتكلم كلام مظبوط والناس خارج مصر بتهابه ويكفى ان اسرائيل كانت مرعوبه من واحد اسمه انور السادات مش بيخافوا فقط لا مرعوبين جولدامائير رئيسة وزراء اسرائيل فترة حرب 73 كانت بترعب من شخص اسمه انور السادات ، فى رئيس كان عنده الجرأه انه يروح جوه الكنيست ويتكلم ادينى انتى الجرأه دى تقدرى تعملى كده اقولك روحى اسرائيل بكره واتكلم جوه اسرائيل وانت عارف كل دول اعداء لك وعينهم عليك لا ده اسمة جبروت كما ان قوة خطه الحرب كلها عملها واحد هو والخداع الاستراتيجى اللى عملوا ده مخ ايه ده ، مخه كان سابق عصره .

وبالحديث عن اقسام الغواصة :

الطوربيد اللى هو السلاح الرئيسى

قسم الملاحه اللى بيمشى الغواصة

قسم اللاسلكى اتصالات

وقسم الانذار اللى هو عينا تحت الميه لان الغواصة لايوجد بها فتحات ولاعيون تحت الميه ما تشفويش حاجه خالص

ده الفكر المختلف بينا وبين الناس ، الناس فاكره تنزل زى ما شافوا فى الافلام تشوفى من نافذة كده ، دى الغواصات " العلميه " لا دى حديد مصمت انتى بتشوفى بالاجهزة زى ماقولتلك قسم الانذار عينينا تحت الميه اجهزة تقولك هنا فى حاجه فى كذا ومشيين على الخريطه ، الخريطه اساسيه عارفه الاعماق ايه مسموح بيها وانت ماشيه فى حته اول ما الاعماق تضمحل لازم تطلعى قبليها اوتمشى فى حته تانيه او تغيرى مسارك ، ولذلك الملاحه بتاعتها صعبه جدا لان التيارات فوق الميه غير التيارات تحت الميه لان ممكن تعملك شفط جامد ما تحسيش بيه لذلك ظباط ملاحه الغواصات من اجدع ظباط الملاحه البحرية .

 

 

 

لا والحياه صعبه جدا ف اثناء الحرب كانت تصل درجه الحرارة داخل الغواصه من 45 ل 50.

هل برودة المياه فى الاعماق لها تاثير على امتصاص درجات الحراة من داخل الغواصه ؟

جسم الغواصه فى الاعماق ليس ليها اى تأثير لان شكل الغواصه اسطوانى البدن من الخارج تنكات المياة مش الغواصه عند الغطس بتقل المياة تقوم طالعه دى تنكات حوالينها البدن الرئيسى داخل التنكات دى كمان فالمياة ما بتوصلش للبدن الرئيسى خالص احنا داخل الانبوبه ، الانبوبه سمكها مثلا فوق ال5 سم ال 10 سم تخينه جدا جدا وثم كلها محكمه احكام رهيب حتى لا تسمح بدخول المياة ولا حاجه يعنى لو فيها ثقب ابره على ضغط 100 متر ولا حاجه يعنى تخش الميه بأندفاع اجارك الله المياة وهى داخله حاجه تفرقع كوتش يضرب فالبلف يفتح خلاص بتوقفه ايه اللى يوقفه انى افتح ضغط عالى جوه الغواصه يوازى الضغط اللى بره عندك فى منظر لا يمكن تشوفيه فى اى حته انا ما شفتش فى حياتى غير فى الغواصه يعنى الفتحه مفتوحه فالميه داخلا فظبط انا الضغط لغايه ما الميه تطلع ، لغايه الميه تبقى واقفه فى الفتحه ولا هى عايزا تدخل ولا انا بطلعها منظر عمرك ما تشوفه فى حياتك فى التاريخ ، الميه واقفه مش قادره تدخل لازما اقولها ادخلى ف اقلل الضغط تدخل ازود الضغط تخرج و الضغط ده طبعا بيأثر على الناس التنفس و الاذن

يعنى الضعظ الجوى فوق الارض يساوى 1 لازم يكون تحت فى الغواصة ايضا 1 حتى لا يتاثر العاملين داخل الغواصة و يسبب لهم اى اصابة او اذى .

و هذا ما ندرسة فى فرقه الغواصات الفرقه اللى كنا بناخدها قبل كده بننزل ندخل الى الانبوبه وبنتعلم كيف نعدل الضغط وحاجات كتير قوى هو ده التدريب الشاق ،

وفى كمان قسم الديزل لان الغواصه ليها حاجتين بتمشيها الديزل فوق السطح والبطاريات تحت السطح ، البطاريات دى عشان تحت السطح طبعا ما تقدرش تمشي بالديزل علشان حيبقى عايز هوا فالهوا هيدخل ازاى حدوده اخره 7 متر بعد كده خلاص فبنمشي ببطاريات ، البطاريات بقى لازم تتشحن كل يوم نطفو ع السطح ليلا نشحن بالديزل البطاريات نوصلها للفول كابستى يبقى خلاص نوقف ونبدء ننزل الصبح بقى ونشتغل بالبطاريات و بتتشحن بالديزل كما ان نظام شغلى بالنهار تحت السطح الماء بمشي الغواصة بالبطاريات قوة الدفع بتاعتى البطاريات بس السرعه بتبقى ضعيفة طبعا مكسمم 8 عقده اى 8 ميل بحرى فى الساعه ،العقده يعنى ميل بحرى ساعه و الميل 1.6 كيلو برى و طبعا بطيئه جدا .

 

 

وعن علاقة طاقم الغواصة ببعض تحت قيادتك :

 

طاقم الغواصه متألف جدا جدا مافيش فرق بين ضابط بحرى اللى هو زى انا كده ضابط بحرى وفيه معانا مهندسين مافيش فرق بين مهندس وبين ضابط بحرى ، لكن المهندس بيكون عسكرى مش مدنى وعسكرى بس مش تنفيذى يعنى مش حربى بس لا هو اصلا شغله الاساسى الهندسه بتاعته اللى هو خدها انا بفهم فى الهندسه زى زيه رغم انا مش مهندس لازم افهم كل حاجه ودى تعمل ايه واستخدمها يعمل ايه وعدم استخدمها يعمل ايه ووقتها امتى انا اللى احدد الوقت الكومندان هو اللى يحدد وقت استخدام الحاجه والمهندس ينفذ مش العكس مع ان المهندس بيبقى على درايه اكتر بطبيعه الشغل لا الامر يطلع يقول للكومندان بينه وبينه الموضوع كذا وكذا عندى عطل هنا الديزل تعبان ما تزودش عن سرعه كذا ويخف شويه كدا يسمع كلامه اوكى ولو مش موافق يقوله لا اعمل البديل كذا كذا يعنى مهما ان كان القرار القرار فهو قرارك الكومندان لازم هو قرار واحد فى الغواصة ( مش بيقولك المركب اللى فيها ريسين تغرق ) هو قرار واحد يتخذه الكومندان والباقى عليه التنفيذ ان شاالله حتغرق الغواصه نفذ مالكش دعوة انا مسئول هو رئيس جمهورية نفسه

الكومندان فى اى وحده عسكرية هو رئيس جمهورية الغواصه او اللنش او المدمره طالما فى البحر خلاص ماحدش له عندك اى حاجه لذلك الاوامر لما كانت تجيلى يقولك اللى انت شايفه اعمله هو اللى فى البر ده مش شايفنى ولاعارف انا حواليا ايه .

ما هو على ضوء الموقف انت تتعامل بقرار اللى تتخذة وتجدة مناسب للموقف لذلك احنا دراستنا كلها اركان حرب والاكاديميه وكل ده ازاى تتخذ القرار السليم وانت لوحدك ماعندكش استشاريين فطقم الغواصه سواء العساكر او الظباط كلهم بينهم الفه ودى الوحده الوحيدة فى البحرية اللى فيها الحاجه دى متالفين تالف رهيب جدا

وبنخافوا على بعض جدا .واتذكر اننى عندما كنت ضابط صغير كانت مشكلتى احل مشاكل الناس اللى برا انا كنت اسافر المنصورة و كنت ضابط طوربيد ونفس الوقت ضابط التوجيه المعنوى واحد عنده مشكله مع اهله مع مراته كنت اسافر احل له المشكله واجيبه مرضى واسيبهم مرضيين واجى ، فنفسيته تترفع فلو قولتيله ارمى نفسك فى التهلكه حيرمى نفسه فى التهلكه

واقعد اكل معاهم فى اكلهم ومافيش حاجه اسمها ضابط ياكل لوحده وده ياكل لوحده او ده اكل وده اكل كلنا طبخه واحده ال 60 فرد فكان الطباخ طبخه للكومندان لغايه اقل عسكرى مطبخ واحد وحله واحده كلنا ناكلوا منها ناكل نفس النوع يعنى قصدى بس ليا فى طبق وهو فى طبقه ، عايزة بعد كده ما ينفذش الاوامر اكيد هينفذ طبعا الاوامر .

 

من الشخصيات التى عملت معها وتاثرت بها :

هناك شخصيتين مهمتين عملت معهم اتنين ما نساهمش واحد علمنى القياده صح الاول اللواء وهبه ذكى الله يرحمه كان حافظ القراءن بالرغم من انة مسيحى ده اللى علمنى قياده الغواصات وكان يتميز بان قلبه جامد علمنى وانا صغير برتبة نقيب وكان يترك لى الغواصه اقودها امامة وهو جالس بجوارى كان قلبه جامد جدا مهما كنت اخش فى مركب ما يقوليش غلط كدا يا وحيد لغايه ما يشوف امتى انا ابدء اتصرف واتلاشي وابعد ده اللى علمنى صراحه

التانى اللواء مدحت الحريرى ربنا يديله الصحه والعافيه سيادتة اللى علمنا كان بيقعد معنا يقولنا كل صغيره وكبيره نقل لى كل الخبرات

هما الاتنين اللى اتعلمت منهم فى سلاح الغواصات

وده اللى خلانى بقيت كويس من تعليمهم ، وفى بقى فى العساكر انا كنت ضابط طوربيد وكان معايا عسكرى اسمه احمد عبد الرازق لغايه ما طلع من البحريه افتكر كان صول او ضابط

كان امين وممتاز فى شغله وكان لماح معايا لذلك اخدته معايا فى كل تنقلاتى لان الضابط يتنقل كتير لكن العسكرى ما يتنقلش كتير يفضل فى نفس الغواصه انا كنت اخده معايا اسافر اخده معايا يعنى كنت اوصى عليه انه يكون معايا .

كيفية الاعاشة تحت الماء :

لما ننزل بنقفل الغواصة بنحكمها احكام جامد كل الابواب احكام قوى يعنى بنتنفس الهوا اللى جوا الغواصه اللى احنا قفلنا عليه طاقم الغواضة 60 شخص بيتنفس من الهواء داخل الغواصة

مثلا قولى الهوا ده حيقعد معاك اد ايه 3 -4 ساعات مثلا بناخد الهوا ونطلعوا ثانى اكسيد الكربون فبيقى بيتحول الاكسجين لثانى اكسيد الكربون بيعملك وخمول وجمود عقلي وقله كفاءة خلاص انت مش عارف تشتغل وتبقى مش قادر تقوم تعمل حاجه تبقى عايز تنام كسلان

فى اجهزة عملانها كانوا الروس تفتحها تضع فيها حلقات عامله زى الخرز تحولك ثانى اكسيد الكربون لاكسجين لكن عيبها ايه انها تطلع نار جهنم ، احنا كنا ساعات نتركها مقابل اننا نتحمل منشعرش بدرجة الحرارة لان الحرارة تحت الميه عدونا ، الاول الاكسجين رقم واحد وعدونا التانى الحرارة ، فعندما تصل درجه الحرارة 50 درجة مع الرطوبة ( و دى حاجه تانيه خالص ) مع الصيام فى رمضان

انا جت عليا ايام كان الفطار الساعة 5 كنت بفطر الساعة 10 ليلا على الماء لان مكنش بيبقى ليا نفس اكل اصلا محتاج فقط ماء او شوربة او فاكهة فقط لاغير .

اخدنى الفضول فى الاسئلة لمعرفة المزيد من التفاصيل كيف كنتم تتصرفوا فى ظل خوفكم على الاكسجين الموجودة فى الهواء داخل الغواصة و مع كم الفنيين الموجودين ؟

كنا بتنفس عادى و بنشتغل وايضا الاجهزة بتستهلك معانا اكسجين وكنا بنتحدث فيما بيننا لتنفيذ اوامر العمل و فى اوقات معينه ممنوع الكلام

و الاوامر كان فيه دايره داخليه اتصالات الكومندان فى غرفه القياده وعنده ميكرفون يذيع على كل القطاعات

و للعلم : الغواصه 7 قطاعات والقطاع يعنى حجرة كبيره بس رقم 1 وهى اكبر واحده موجود فيها الطوربيدات

والطوربيد طوله 8 متروالانبوبه طولها 8 متر

الغواصة طولها تقريبا 75 متر لكن الداخلى 68 اللى احنا عايشين فيه لان من الخارج فى التنكات اللى بتنزل وتطلع الغواصه وبعدين الانبوبه الاعاشه والاجهزة والسلاح والطوربيدات داخل بدن الغواصه من الداخل .

 

تسليح الغواصة :

سلاح الغواصات كلة صناعة روسى ،فيها طوربيد وصواريخ دلوقتى زى بتاعتنا الجديده دى فيها صواريخ وهاربون ، تطلق الغواصة الطوربيدات فى حال الهجوم تحت الماء وليس فوق الماء

انا دفاعى الاول و الاخير عن نفسي انزل الميه بسرعه اعمل حاجه اسمها غطس سريع فى ثوانى اكون تحت الميه لو جالى طيران معادي والحكايه دى جاتلى كتير قوى طيران يجى لنا ننزل بسرعه تحت الميه لاعماق 30 -50 -100 متر لغايه اننا احس ان اننا مش باين من فوق لان الغواصه بتفضل بينه من فوق عشان الميه شفافه

فى سر مهم عند الدهان هناك معايير لاختيار اللون المناسب لكى تساعد على تمويه الغواصه حتى تتعثر رؤيتها من خلال الماء . و مش اسود زى الافلام حسب الميه انا بفضل اعمل اللون اجيبه مع الميه لغايه ما اتأكد ان الغواصة لا تظهر على عمق ال 30 متر والهدف لما تطفو على السطح حتبان الغواصه انا مش عايز حد بالطيارة يشوفها وهى تحت الميه هى كدة سهل بنضرب عليها خلاص يعنى عايز الطايرة لما بتطلع ما تبنش

لذلك كنت انا بطلع مع الطياره كانوا يطلعونى انا اشوف الغواصه مكشوفه ولا مش مكشوفه كنت اطلع الاقيها دى باينه دى سهل قوى تضرب يا جماعه الغواصه كده حرام عليكوا لا اقوم مغير اللون .

واللوان بتاعتها بتبقى الوان لون الميه بوصل كده بفضل اتدرج اللون لغايه ما يختفى اللون ماحدش شاف غواصه ماشيه يعنى انتى تلاقى تحت الميه ماشي كده وهى سودا والميه شفافه باينه افضل افتح فى اللون افتح فى اللون لغايه ما تبنش اللون ده يا جماعه هو ده ندهن بيه الغواصات بتاعت البحر الابيض والبحر الاحمر تلاقيها اغمق شويه عشان هناك الميه غامقه فبيكون اللون رصاصى فاتح او رصاصى غامق .

 

 

الغواصه انبوب فيها الديزل قطاع 5 و قطاع 3 ده القياده للكومندان وقطاع 4 البطاريات و قطاع 6 موجود بداخلة المواتير وقطاع 7 موجود بداخلة الطوربيدات الخلفية والرفاص ( مروحه المحرك ) بدء من اخر 5 لغايه 7 اللى هو عمود الرفاص وفى اخره بيبقى الريش

العمود الرئيسى الى بتعلق عليه الريش ماسك من 5 لحد ما يخرج من 7 فيه الريش وهو جزء اساسي داخل الغواصه طبعا هو اللى بيمشى الغواصه ده المحرك الرئيسى لذلك الديزل لما يشتغل القبطان يقول .

كيف تتعاملون عند حدوث عطل فى المحرك الرئيسى ؟

اصلا طاقم الغواصة متدرب جيدا على العمل الحربى وعلى اصلاح جميع اجزاء الغواصة فى كل الظروف وبيدرب على الصيانه وبيدرب ازاى يصلح اعطال وهو فى البحر وسط البحر العالى وفى وسط ضرب النار وفى سط كل الكلام ده مين حيصلح حيجيب منين ناس مش يقولى انا عطلان حاروح الورشه لا انا الورشه انا كل حاجه فنين الكهربا يصلحوا كهربتهم ، الديزل يصلح الديزل ، مسؤلى الطوربيد يصلحوا الطوربيد ، مسؤلى الاسلكى يصلح اجهزته كل شخص مسؤل عن جهاز هو المسؤل عن اصلاحة فى حال العطل. لانهم حاصلين على دورات تدربيه لاصلاح الاعطال تحت اى ظرف او حال .

الفرق بين البحريه المصريه والبحرية الاسرائيليه

مصر كانت متفوقة جدا حقول والدليل على كلامى مين اللى ضرب المدمرتين ايلات ويافو ؟ لنشات الصواريخ المصرية يبقى كانت متقدمة ومتفوقة ولا .

واصبح هذا اليوم هو عيد القوات البحرية المصرية . وغيرت استراتيجيات القوات البحريه فى العالم كله

لان روسيا انتجت صاروخ ال ( b 15 ) ولم تجربه روسيا اعطته لنا و اتجرب فى مسرح العمليات هنا

اه يعنى ممكن يبقى اول تجربه للصاروخ  اللى انتجتة ده يغرق مركب وهذا يرجع لكفاءة الضابط البحرى المصرى صاحب الكفاءة العالية والتى غيرت مفاهيم و استراتيجيات العالم كلة .

وكان توزيع الغواصات فى البحرين الابيض و الاحمر هو

البحر الابيض كان هناك 4 غواصات رقم 28 و 21 و 24 و 25

و البحر الاحمر كان هناك غواصتيين هما 22 و 23 .

المهمه اللى قمت بيها فى 73 اللى كانت ضرب المركب التجارى اللى هى الاسرائيلية واصلا فى الاساس الاوامر هى قطع خطوط مواصلات العدو فى البحر الاحمر وحصار باب المندب وكان على الماشي كان ضرب المركب التجارى ومحاصرة باب المندب اكمل الحصار لان اليوم فيه سفن لما تقولها عندى غواصتين فى الميه دى بتمثل بالنسبة له رعب اذلى لاى قوات بحرية تانية

يعنى المركب هو شايفها فوق السطح اقدر اتعامل معاها لكن الغواصة اللى تحت مش شايفها فهى مجهوله بالنسبه للعدو تماما مكانها مجهول تماما بالنسبه له عشان يطلع يشوفنى يطلع 600 طياره عشان يشوفنى او يعمل بحث بقى ويقعد مده كبيره قوى بالهليكوبتر اذا كان عنده مكافحه الغواصات وده ماكنش عنده طبعا الا اذا كنت انا اقل من 30 متر يشوفنى حاجه وعشرين طالع او انا فوق السطح بليل لا بليل استحاله لذلك اطلع بليل على راحتى واقف وانا مش خايف واشحن بطارياتى واهوى الغواصه والناس تطلع تاخد هوا شويه وتنزل يعنى و ناكل بليل كلنا لاننا بليل نصحى كلنا نفوق بقى واللى بيشرب سجاير يطلع يشرب سجاير وكل حاجه واللى عايز ياكل ياكل كتير وبعدين بالنهار بقى كله ينزل ما بنمش بقى الشغل بيبقى اصعب بس اللى هو فاضى يخش ينام بالنهار بالعرق والحرارة اللى انتى شايفها دى وعدم وجود هوا .

الفترة من 1965 الى 1967 كنا بنطلع نتدرب، الحدود ليها لنشات تحميها ، الغواصه استراتيجى تطلع تعمل مهام متقدمه خارج مصر فمثلا نذهب نستطلع حيفا ، ، اما وقت العمليات لا لازم اجازف وادخل حيفا بالغواصة استطلاع

وكنا بندخل و نخرج ولا هما هنا كانهم مش موجودين ، لا وصورنا وفيه الغواصه 24 دخلت جوه حيفا صورت وطلعت صورت الوحدات على الارصفه عندهم هناك بالغواصه ورجعنا ، وهذا كان اصعب موقف الحمد لله ولم يحدث فى الفريق اى اصابات ولا جسم الغواصه نفسه حصله حاجة لان احنا الاصابات تتم فى التدريب وليس فى الحرب لان التدريب ذى الحرب بالظبط خلى بالك انا لما اطلع اتدرب بنزل بالغواصه بغطس وده خطر جدا جدا اكنى زى الحرب فممكن ترشق فى العمق وفيه خطورة ونزول وطلوع والنزول والطلوع ما بفضل اعملها كذا مرة ، و للعلم الغواصة تقدر تمشي زجزاج ومش صعب عليها ف بنحدد طريقها من نقطة الى اخرى لكن زجزاج و بتكون حركتها بطيئه جدا الغواصة دورنها بطيئ والدوران اللى هو نص القطر بتاعها كبير لا الغواصة صعبة قوى فى مناورتها وفى كل حاجة كل حاجه بتتعمل ، كل الاعطال بيتم اصلاحها و فريق العمل تحت الماء و اتذكر اصعب الاعطال كان عطل فى الديزل حصل فية كسر ولم يكن معنا قطع غيار و استطعنا نمشى بالغواصة ب ديزل واحد فقط لانهم هما ديزلين مكنتين يمين وشمال انت ممكن تمشي بيهم او ممكن نمشي بمكنه واحده بس هى المشكلة بقى انتى بتمشي بيها بس بليل بتعمل ايه بتشحن البطاريات شحن البطاريات ده عايز قوة جامده قوى قوى فبنشحن بواحده بدل ما ننتظر 8 ساعات ننتظر 16 ساعه وهذا راجع لكفاءة قريق العمل ، فريق العمل متدرب جيدا علي العمل تحت اصعب الظروف .

العمليات التى تمت كانت فى 73 عند ضرب تلك السفينه هو اللى دخل غلط فى المنطقة بتاعتنا دخل فى منطقة الغواصات غلط لذلك وجب ضربه و اغراقة .

 

وحدات العدو الجويه القادرة على العمل مضادة للغواصات في 1973

1-    طائرات رافا المزودة بالعوامات الصوتيه و قذائف الاعماق و الطوربيد الموجهه مضادة / غواصات م /غ .

2-    الطائرات العموديه هل ( 205 ، 206 ) المزودة بالعومات الصوتيه و قذائف الاعماق .

3-    الطائرات العموديه سوبر فريليون المزوده بالازدك الغاطس للكشف عن الغواصات المسلحه بقذائف الاعماق .

4-    من المتوقع ان يستخدم العدو طائرات متجانسه فى الكشف عن الغواصات و اخرى لمكافحهتها فى مجموعات من 3 طائرات هل تزداد وقت العمليات و عند اكتشاف غواصه معاديه .

دور الغواصات المصريه فى حرب اكتوبر (1973)

                                                      

هيئه قيادة لواء الغواصات فى حرب اكتوبر 1973

عقيد بحرى اركان حرب / على عبد الله صبرى   قائد اللواء

عقيد بحرى اركان حرب / ياقوت حسين ياقوت رئيس الاركان

عقيد بحرى اركان حرب / محمد على فاضل   رئيس العمليات و التدريب

المشاركه فى حرب 73 :

جاءت لنا تعليمات ان احنا نغادر مينا سفاجا يوم 2-10 الساعه 10 بليل لاحتلال منطقة عمليات رقم 14 وهى منطقة كده محدده بخط طول وخط عرض حدودى بتمركز فيها واستنى واضرب اى وحده مرت او ستمر من باب المندب .

وعن حماية انفسنا لابد لنا من الارتكاز فى النقطة المحددة لنا اغطس بالنهار ونطفوا بليل ولازم نلتزم بالمنطقة لان اى وحده على علم ان فى غواصه هنا من غواصاتنا لو شوهدت الغواصه خارج المنطقة المحددة بيتم التعامل معها و ضربها مباشرة بدون الرجوع او السؤال لاى من الوحدات و تنفيذا للتعليمات .

وفضلنا فى المنطقة يومين فيها الى ان يوم 7-10 طبعا الحرب قامت يوم 6 انا كنت عارف من قبلها ان فى حرب خلاص .

وتم فتح المظروف يوم 5 / 10 لاقينا الحرب بكره الصبح بكره الساعه 2   واحنا تحت الميه وكان فى صمت لاسلكى ممنوع الاتصال اللاسلكى نهائي من ساعه ما احتليت المنطقة ما اتكلمش خالص بالاسلكى ولا ابعت اى اشاره لاى حد ولا استقبل اشاره ممنوع خالص طبعا لان تتكلم لاسلكى معناها انك انكشفت عن مكانك  

يجيبك مكانك على طول من الحاجات الحديثة اللى عندهم

استمرينا فى المنطقة الى يوم 7 -10 الساعه تقريبا 11 وربع هو تم الاطلاق 11 وربع احنا اكتشفنا المركب من حوالى 10 ونص صباحا وانا تحت الميه لان انا فى اول ضوء بنزل تحت الميه بليل بطلع بس فنزلنا ونفضل على عمق التلسيكوب اللى هو تطلع المنظار اخره البيرسكوب ده 7-8 متر لغايه ما شاهدنا المركب اللى مرت من باب المندب قربنا منها قربنا منها لغايه ما ميزنها بالعلم الاسرئيلى علما بان القرار انك تضرب بدون تميز للعلم .

ايام اسكندرية فى 67 كان الامر ميز علم اسرائيلى الاول ثم اضربها ، علم مش اسرائيلى ما تضربهوش يكون مركب يونانى بتاع وفعلا ضربنا مركب يونانى فى 67 بالغلط احتياطات امن لكن هذة المركب ميزنا العلم وشاهدنا عليها علم اسرائيلى فقربنا منها وحضر الكومندان المسأله بتاعتنا لان وقتها كنت برتبة رائد و مسئول طوربيد

وجهزنا الطوربيدات وضربنا 6 طوربيدات مش واحد لا 6 مره واحده يطلعوا كده زى المروحه اللى يضرب قدام يضرب فى النص يضرب فى الاخر عشان ما تروحش مننا وفعلا انا عشان كنت ضابط طوربيد ضربت 6 وطلعوا مع بعض بنجاح لان ممكن يطلعوا 2 منك بس والباقى ما يطلعوش الحمد لله ال6 طلعوا ودى كانت كفاءة من الطقم مش انا لوحدى انا والطقم وفعلا ضربوها وغرقهوها انا شوفتها الكومندان نده لى وقالى تعالى شوف يا وحيد شوفها ، شوفتها وهى بتتقسم نصين وبتغرق يعنى المقدمه بتعاتها طلعت فوق وتغرق وشايف الناس بتجرى على السطح وللاسف الكاميرا التليسكوب كانت عطلانه علشان نصورها .

للاسف يعنى لم يكن معمول حسابها وهو بيجهز الغواصة للابحار دى عطلانه لم يكن هناك قطع غيار ليها فانساها حيعطل غواصه عشان كاميرا ،

السؤال اللى بيطرح نفسه فى النقطه دى اثبتوا ازاى انكوا ضربتوا المركب التجارى دى ولا حاجه هما العمليات القاهرة سجلتها موجوده يوم 7-10 الساعه 11 وربع صباحا

حاقولك اثناء موقع الغواصه لتنفيذ الاعمال القتاليه قامت الغواصه 22 سعت 11 وربع يوم 7-10 من الموقع الفلانى بأطلاق عدد6 طوربيد على سفينه اسرائيلية وتم اصابتها اصابه مباشرة وشوهدت متوقفه ومائله على احد الاجناب وبعد كدة غرقت

بلغ عنها اليهود وهما اللى اكدوا كلامنا

طلعت من موقعى ده ، قالوا لى تحرك الى بورسودان وفعلا دخلت بورسودان تانى يوم الساعه 10 الصبح قاعد طول الليل فوقي كمية طيران لا تتخيليه فى البحر

مش مركب اسرائيلى اضربت ؟؟؟ جالى فوق ال60 طياره شايفهم على الردار عندى باين الضابط بتاع الانذار يقولى الطيران جاى فى الاتجاه الفلانى وصعب تطلع بالعين لان وقت الغروب بدء

كام يابنى يقولى 60 طيارة دول لو ضربونى كنت انتهيت لكن ربنا عماهم عننا لغايه ما دخلنا بورسودان لما مشينا كده وذهبنا الى بورسودان لان العدو لم يتوقع اننى توجهت الى بورسودان وظل يبحث المنطقة اللى ضربت منها بس وانا سيبتها من ساعة ما ضربت و تركنا المنطقة فى وقتها اللى ضربت منها لانة هيبقى غباء لو استمرينا فى نفس المكان .

 

وعن مكاسب العمليه حتى لو ما ضربناش مركب موجوده هى النتائج بعد كده كنا من ضمن قوات حصار باب المندب لان فى غواصتين فى نص البحر والمدمرات عند باب المندب يعنى معروف ان المركب بتعدى بتضرب اها اتضربت من الغواصات فاصبح عمليه صعبه وقفنا الملاحه تماما كان فى 11 سفينه عندهم كانوا هيدخلوا فبدؤا يلفوا من رأس الرجاء الصالح و11 سفينه اتحجزت جوه ميناء ايلات ماعرفهوش يطلعوا كانوا المفروض يغادروا خافوا يطلعوا اللى بيطلع بيضرب فكدا احنا نفذنا البنود بتاعتنا بالظبط قطع خطوط مواصلات العدو وتأمين باب المندب

و نجحت المهمه 100% احنا والمدمرات نفذنا مهمتنا على اكمل وجه ولم يحدث اى اشتباكات اخرى لاننا لا كنا بندخل بورسودان لانها كانت تعليمات ونغادر كل شويه نحتل منطقة تانيه غير المنطقة الاولى اللى يعدى عليك ينضرب ولم يمر من وقتها

اثناء حرب 73 :

كان عدد الغواصات فى البحر الاحمر 2 فقط 22 و 23 وانا كنت فى 22

كانت التعليمات قطع خطوط مواصلات العدو دى المهمة الرئيسية ففى شهر اكتوبر مصر اغلقت باب المندب يعنى نمنع اى مركب تجارى انها تخش البحر الاحمر كله سواء تبعنا او مش تبعنا واولهم اليهود اسرائيل ، جالى امر مباشر بالتنفيذ كانت سفينه تلاجة هى المركب التلاجه دى كانت عدت قبل ما يتقفل باب المندب قبل الاعلان ضربتها يوم 7 هى عدت قبل يوم 5 اى قبل ما يقفلوا باب المندب رسمى فانا اتذكر ان الرئيس لسادات اعلن قفل باب المندب الساعه 2 الا عشره او الا ربع تقريبا

لانة لا يستطيع ان يعلن قبل كده لان الاغلاق معناه اعلان حرب فطبعا قبليها بربع ساعه قال واعلنه مع البيان الاول بعد ضرب الجبهه بالمدفعيه دى لان فى 67 الغلطه دى عملها جمال عبد الناصر لما اعلن غلق المضايق ومشي البوليس الدولى فهذا ادى الى ان حصل غليان فى الدنيا قبليها بكتير فكلوا اخد حذرة   فكانت عبرة للسادات خد من ولم يكررها .

احنا كنا غواصتين متمركزيين فى البحر الاحمر و بعد قرار الاغلاق اتحبسنا هناك لدرجه كنا عندنا عمره بنروح نعمل فى باكستان عمره المفروض لان كان كفاءتنا ما تزدش عن40 او 50% خلى بالك ودخلنا الحرب واحنا ناقصين كفاءه الغواصتين عايزين عمره تدخلهم حرب ازاى ؟

يوم 2 اكتوبر صدر قرار اننا نغادر ونحتل منطقة عمليات غادرنا يوم 2 اكتوبر الساعه 10 ليلا جالنا مظروف قال مايتفحتش قبل يوم 6اكتوبر احنا عرفنا انه حرب خلاص انا رايح احتل منطقة عمليات ومظروف حافتح حيقولى اضرب يوم 6 يعنى انا لو فتحت يوم 2 انا عرفت ميعاد الحرب بس طبعا الامانه انى مانفتحهوش الصراحه

وكانت هناك استعدادات جامدة جدا تعطى مؤشرات حرب فقبل الحرب مباشرة طلعنا يوم 2-10 من قبليها باسبوع بدءنا نحضر انفسنا والاصلاحات تمت ومؤن طعام ومؤن مياة كل هذا الاستعدادات قبلها باسبوع طبعا لخطة التموية طبعا لان موضوع التجهيز يتم فى خلال ايام بمعنى ملئ مياة الشرب ياخذ يومين ضبط الطوربيدات فى مكانها يومين ايضا .

وجاء الامر بالمغادرة يوم 2 الساعه 10 ليلا من سفاجا

ولازم الغواصات تغادر ليلا كى لا يراها احد لانها سريه فكنا نطلع بليل ونحتل منطقة العمليات قبل اول ضوء الصبح الفجر لازم تكون مخلص وغطسان وكله ماحدش يعرف روحت فين وجاى منين باخد اوامرى كلها من القاهرة مش من البحرية لكن من غرفة عمليات القاهرة

ولان عمل الغواصات استراتيجية فمين بيمشى الاستراتيجى ؟ غرفة العمليات بالقاهرة مش اسكندرية وانا لو اسكندرية كلمنتى اعمل كذا ما اعملش ما اسمعش كلامه لان انا التعليمات عندى كده وانا قرارى كده وشغلى كده وهو مايحطش نفسه موقف زى ده هو مصر تستشيره تستشير البحرية دلوقتى كذا كذا حنقوله كذا ايه رأيك وطبعا الا الغواصه القرار قرار الكومندان لوحده فقط لا غير ،

من 67 وان باتدرب على كده وان مابقاش كومندان غواصة الا لما ابقى مريت بالتجارب دى كلها واتعلمت من القادة اللى قلبينا ده اشوف بيعمل ايه ورد فعله

نرجع مرة اخرى لجزئية كنت بتتكلم على السلاح اللى هو سنه 84 بالنسبه للدولفين 209 ، ذهبنا لكى نتعاقد اولا وجدنا الغواصة طبعا ممتازة فيها تكنولوجيا حديثة جدا الاعاشة ممتازة ونضيفة وكل حاجه وسرعات بس المشكلة اختلافنا على السلاح كان عايزين ناخد طوربيد هاربون هو كان وقتها بيعمل فى الحلف الاطلنطى لكنهم رفضوا .

الفرق بين الطوربيد والانواع الاخرى

الطوربيد فى الغواصة التى عملت عليها طوربيد عادى بخارى اى يعمل بالجاز ويسير ومن نوع اللى الاتجاه اللى تضربيه هو الاتجاه اللى يسير فيه ما يلفش يمين ولا شمال ،انما الهاربون ده يسير مع صوت المركب

كيف يسمع الصاروخ الهاربون صوت المركب هى دى التكنولوجيا الحديثة يمتلك حساسات يسمع صوت المركب وممكن اعادة توجيه من الغواصة باللاسلكى كلها اشياء حديثة ،لكنهم رفضوا اعطائنا لانه كان لسه بيستخدموه فى الحلف الاطلنطى عام 84 هما كانوا لسه بيستخدموه فى الحلف الاطلنطى فالحلف رفض ان احنا نحصل على السلاح حتى لا تصبح على نفس قوتة

عند الاتفاق طبعا قالك استخدم الغواصه خد الغواصة لكن اخد غواصة من غير هاربون اعمل بيها ايه يبقى كدا اعطانى سلاح غير كامل .

مما اضطرنى ارفض التعاقد عليها هما اتعقدوا عليها دلوقتى لما سمح لهم يودولهم الهاربون

ماهى الغواصه ليست روسى الغواصة المانى والناتو له كلمة في السلاح اللي بيوصل لنا

عمل الغواصات المصرية في البحرين الاحمر والمتوسط

البحر الابيض :

1-    قامت الغواصه "28" بالتخلص من الالغام ( عدد 8 لغم تاثيرى م.د.ت)  سعت 0600يوم 5/10 بالموقع ( ) ولم تنفذ عمليه تلغيم ميناء حيفا لاسباب فنية .

2-    قامت الغواصة "29" بالتخلص من الالغام ( عدد 8 لغم تاثيرى م.د.ت )سعت 2144 يوم 7/10 بالموقع ( ) ولم تنفذ عمليه تلغيم ميناء حيفا لاسباب فنية

3-    قامت الغواصه "29" سعت 0530 يوم 11/10 فى الموقع ( ) شمال سيناء باطلاق (2) طوربيد على سفينه تجاريه و سمع صوت انفجار .

4-    قامت الغواصه "26" سعت 2125 يوم 23/10 فى الموقع ( ) غرب الاسكندريه باطلاق (1) طوربيد على سفينه تجاريه و تم اغراقها .

البحر الاحمر :

فى البحر الاحمر قامت الغواصات المصريه ( 22،23) بجهد مشرف بالاشتراك بدور رئيسى استراتيجى فى حصار " باب المندب " و كأن من نتيجه ذلك ايقاف الملاحه تماما و حجزت "11" سفينه بميناء ايلات ووجهت "12" سفينه اخرى للدوران حول راس الرجاء الصالح ..

وبذلك قامت الغواصات المصريه بالتعاون مع المدمرات بتحقيق مفهوم استخدام القوة البحريه وفكر القيادة السياسيه بتحريك قضيه الشرق الاوسط و الوصول للهدف العسكرى و ذلك بتحطيم نظريه الامن الاسرائيلى و تحرير الارض و الوصول الى استراتيجيه السلام بعد معركه مشرفه ردت فيها كرامه مصر ....

مســـــيــر اعــمــال القــتــال

أ‌-       تنفيذ عمليه عرقله خطوط المواصلات البحريه الاسرائيليه بالبحر الاحمر وتتضمن الاجراءات الاتيه :

1-    حتى لا تتاثر خطوط الملاحه للدول الصديقه المطله على سواحل البحر الاحمر وفى نفس الوقت تنهار نظريه الامن الاسرائيلى القائله بان تامين الملاحة لميناء ايلات يعلن عن منطقه ممنوعه شمال خط عرض ( 2300) ش تحظر فيها الملاحة .

2-    استخدام الغواصات فى ارجاء المسرح للتعرض للسفن التجاريه مع الالتزام بمهاجهه السفن الاسرائيلية بعد تميزها جنوب خط العرض (2300) ش ومهاجمه السفن بدون تمييز شمال خط العرض المذكور .

ب‌-   عمليات التعرض للسفن التجاريه المعاديه

1-    اعتبار من سعت 1500 يوم 5 اكتوبر تم احتلال الغواصتين "22 ، 23" لمناطق عملها مستعده لتنفيذ مهمه التعرض و مهاجمه السفن التجاريه بالطوربيد

2-    نظرا للحاله الفنية للغواصتين فقد تم تنظيم فتح الغواصتين الى مناطق العمليات بالتنسيق مع الوحدات البحريه الاخرى التى تعمل جنوب المسرح بنفس اسلوب و طريق الاستخدام فى البحر المتوسط

3-    امكن فى المتوسط الاحتفاظ بغواصه عامله بالبحر خلال فترة العملياتحيث بلغ اجمالى حجم نشاط الغواصات فى الفترة من 6/10/1973 الى18/1/1974 ( اجمالى مدة الفترة 105 يوم ) عدد "42" يوم / غواصه بالبحر و توزيعها

كـالاتـى:

1-    فى الفترة من 6-13 /10 ( مدة الفترة 8 يوم ) عدد " 11" يوم / غواصة بالبحر بمتوسط عدد1,4 غواصة بالبحر يوميا .

2-    فى الفترة من 14 -15 / 10 ( مدة الفترة 2 يوم ) عدد "3" يوم / غواصة بالبحر بمتوسط عدد 1,5 غواصه بالبحر يوميا .

3-    فى الفترة من 16-25 / 10 ( مدة الفترة 10 يوم ) عدد 4 يوم / غواصه بالبحر بمتوسط عدد 0,4 غواصه بالبحر يوميا .

4-    فى الفترة من 26/10 -18/1/1974 ( مدة الفترة 85 يوم ) عدد 24 يوم / غواصه بالبحر بمتوسط عدد 0,3 غواصه بالبحر يوميا .

أ‌-       احداثيات موقع تنفيذ الاعمال القتالية :

قامت الغواصة رقم (22) سعت 1115ى 7/10/1973 بالموقع ( ) باطلاق عدد (6) طوربيد على سفينه نقل اسرائيليه امكن تميزها من علامة المدخنة وسمع صوت انفجار و شوهدت متوقفة وتميل .

حجم و اوضاع قوات اللواء :

أ‌-                   بالبحر المتوسط

كان عدد الغواصات بميناء الاسكندريه 10 غواصه ( 4 غواصه طراز 613 ، 4 غواصه طراز 633، 2 طراز 613 معدل ) وبيناتها كالتالى :

1-                الغواصتين ( 24، 25) بعمرة دوريه .

2-                الغواصتين ( 5 ، 7 ) خارج التكوين القتالى عمليا نظرا لحالتهما الفنيه حيث تم استلام الغواصه ( 5 ) من الجانب السوفيتى فى ابريل 1955 و الغواصه (7) فى يناير 1959

3-                الغواصة (26) ذات كفاءه محدوده للغايه نظرا لحلول موعد عمرتها الدوريه .

4-                الغواصة (28 ) حل عليها الدور فى العمريه الملاحيه .

5-                الغواصة ( 4، 2، 29 ) مستكملين للمعدلات و جاهزة للقتال .

6-                الغواصة (21) متمركزة مؤقتا بميناء طرابلس بليبيا وتم اعادة تمركزها بميناء الاسكندريه سعت 1500 ى 1 اكتوبر 1973 .

7-                الغواصة (1) استكملت المعدلات ما بعد العمرة المحلية .

ب‌-               البحر الاحمر :

عدد (2) غواصة طراز 633 ( 23، 22) متمركزين بميناء سفاجا بقاعدة البحر الاحمر البحرية وكفاءتهما الفنيه محدودة نظرا لحلول موعد عمرتها المؤجلة من فبراير 1973

وعدم توافر حوض بالمسرح الجنوبى وكان من المخطط ابحارها الى ميناء كراتشى بباكستان لعمل العمرة اللازمه لها .

الغواضة ( 26) :

مغادرة الغواصه للقاعدة سعت 1040 يوم 22/10 .

1-    المهمة : تنفيذ عناصر من المهمة رقم "2" بمنطقة خاصه امام الضبعه .

2-    التحركات :

ب‌-   الوصول الى المنطقه الخاصه سعت 0400 يوم 23/10

ت‌-  مهاجمه سفينه و تدميرها سعت 2145 يوم 23/10 .

ث‌-  مغادرة المنطقة الخاصة سعت 2155 يوم 23/10 .

ج‌-    الرباط بقاعدة الاسكندريه البحريه سعت 0845 يوم 24/10

مرحلة اقتحام قناة السويس و الاستيلاء على رؤوس الكبارى ( 6-13 اكتوبر 1973 )

الغواصات المتواجدة بالبحر الاحمر خلال الفترة عدد "2" غواصة (22 ، 23 ) .

الغواصه (22) : مغادرة ميناء سفاجا سعت 2200 يوم 2/10

المهمة :

1-    الابحار فى تشكيل مع المدرمة ( سجم رشيد ،) الى ميناء عدن على السطح .

2-    باستلام الكلمة الكودية الخاصة ( مكبر ) يتم تنفيذ العملية التعرضية ( جرانيت / 2 ) المعدلة و احتلال منطقة العمليات رقم (15) .

التحركات :

الوصول الى منطقة العمليات رقم "15" سعت 1425 يوم 4/10 و مغادرتها سعت 1540 يوم 6/10 ومهاجمة هدف معادى سعت 1115 يوم 7/10 والرباط ببور سودان سعت 1000 يوم 8/10 .

الغواصة (23) :

مغادرة ميناء سفاجا سعت 2200 يوم 2/10 .

1-    المهمة :

الفتح فى تشكيل الى ميناء عدن مع الاستعداد لاحتلال المنطقة "14 " عمليات و تنفيذ مهمة قطع خطوط المواصلات المعادية وذلك بتدمير السفن التى تمر فى منطقة عملها بعد تمييز جنسيتها .

2-    التحركات :

أ‌-       الوصول لمنطقة العمليات رقم "14" سعت 1500 يوم 5/10 ومغادرتها سعت 1224 يوم 6/ 10 والوصول الى منطقة العلميات اتجاة 194 مسافة 60 ميل من شهب سعت 2033 يوم 6/ 10

ب‌-  مغادة منطقة العمليات سعت 2000 يوم 12/ 10 و انتهت المرحله و الغواصه بالبحر فى طريق عودتها لميناء بورسودان .

مرحلة التطوير من 14/14 – 15/10

الغواصات المتواجدة بالبحر خلال الفترة 1-2 غواصة ( 22، 23 ) .

الغواصة (22) : مغادرة ميناء بورسودان سعت 0030 يوم 14 /10 .

1-    المهمة : مغادرة الميناء سعت 0030 يوم 14/10 واحتلال منطقة تمركزها باتجاة 163 مسافة ميل من قمر المرور على السطح و الغطس عند الضرورة وبتم تدمير السفن الاسرائيلية .

2-    التحركات : وصول منطقة عملياتها سعت 0947 يوم 14/10 و مغادرتها سعت 1750 يوم 15/10 و ظلت بالحر حتى نهاية الفترة .

الغواصة (23): عودة الغواصة من البحر سعت 1530 يوم 14 / 10 .

مرحلة القتال غرب القنال من 16-25/10

1-    الغواصات المتواجدة بالبحر غواصة "22"

2-    الرباط بميناء بورسودان سعت 0830 يوم 16/10 .

احداثيات مواقع تنفيذ الاعمال القتالية

قامت الغواصة "22" سعت 1115 يوم 7/10 بالموقع (2145 ش ،3750 شق ) باطلاق عدد (6) طوربيد على سفينة اسرائيلية امكن تمييزها من علامة لمدخنة و سمع صوت انفجار و شوهدت متوقفة و مائلة على احد الاجانب

ضابط الطوربيد الذى قام بالاطلاق رائد / وحيد سعد الدين .

التكريمات :

-         بعد انتهاء الحرب ذهبنا الى بور سودان فكنا ندخل و نخرج الى ان انتهت الحرب وكنا كارت الضغط فى مباحثات الكليو 101اللى هى قوات حصار باب المندب وكنا أحد كروت الضغط في المباحثات و كان الجمسى الوحيد اللى ماسكه اننا مش حاخلى القوات اللى فى باب المندب دى تمشي ولا حفتح باب المندب الا لما توافقوا على طلبتنا ده الكارت الاساسى اللى كان فى ايديهم السادات مع المجموعه المسؤلة عن ملف المفاوضات .

و نجحت لاننا لم نترك اماكنا حتى بعد مرور عام من الحرب وكنا ندخل و نخرج لكى يشاهدنا اليهود والمراكب طبعا اللى وقفه هناك شايفنها حتى الامريكان حاولوا يدخلوا كانوا بيغلسوا على المدمرات بتاعتنا كانوا بيقربوا منا كانوا بيمشوا ما بيردوش يحتكوا بينا الامريكان كان بيقولك حاكسر الحصار لو انتى جبت الجرايد القديمه حتلاقى بيقولك حاولت المدمرة الامريكانى كسر الحصار .

يعنى ايه كسر الحصار يعنى تقولك انا معدى اها وورينى حتعمل ايه فكنا نسيبوه بس يقوم راجع تانى يدخل يقابل مركب يقابل مركب ،يقوله فى غواصتين تحت الميه كمان اسرائيل تقول له يقوم راجع يخاف احسن ينضرب و طبعا انا اعلنت الكلام ده من بدرى لان دى امريكانى او هندى او صينى او اى كان

لا مليش دعوة انا اعلنت اى مركب تكسر الحصار من البحرالاحمر حتضرب اى كان جنسيتها لذلك التعليمات عندى اضرب بدون تمييز يعنى ما تميزش العلم ده مين امريكانى روسي اضربه انت دخلت فى منطقة حرب ليه

العيب عنده انت داخل منطقة حرب ليه .

والدليل قوتنا البحرية ضربت هنا فى الاسكندرية سنه 67 مركب اسمنت يونانى قربت من ميناء الاسكندرية اتضربت وغرقت ولا له عندى حاجه هو الغلط من عنده هو معلن من يوم ان دى منطقة حرب منطقة عمليات ايه اللى يدخلك فيها ممنوع تدخل اى منطقة حرب العالم كله ده قرار عالمى هو كان النظام كده دى حاجات محدش حايقولهلك ابدا .

ده ما يدخلنيش فى مشكلة دبلوماسية معاه او سياسية لان الغلط من عنده هو لم يلتزم بالاوامر .

وكانت الغواصات روسى احنا متعودين ومتدربين على السلاح الروسي لان القاده الاوائل ذهبوا روسيا واتمرنوا عليها وعلمونا . مثل مانا قبل ما اترك الخدمة دربت اجيال قبل ما اخرج معاش وخدت كومنداين معايا ودربتهم وعلمتهم اسلوبى و الخبره اللى اكتسبتها ثم خرجت معاش .

و بعد مرور كل هذا الوقت لم نكرم ولم نحصل على اى تكريمات من القياده ولا بيذكرونا ماهو سلاح الغواصات فعلا مجهولين

 

 

سبق و ذكرت اننا كنا قاعدنا فى بور سودان لغايه ما المباحثات انتهت هما كرموا كل الناس قبل الموضوع ده هنا الجيش والطيران والبحرية وكل الناس اللى شافوهم ليهم حق يتكرموا كرموهم والغواصات محدش كرمها و لهذا حزا فى نفسى

-         اول مره اتكرم كان فى الموضوع ده كانت وزيره الثقافة ايناس عبد الدايم هى الوحيده اللى كرمتنى كانت فى دار الاوبرا العام الماضي وانا لما طلعت انا قولت الكلمتين دول خلى بالك للاسف ان حضرتك كرمتينى كوزارة الثقافة ولم تكرمنى القوات المسلحة المصرية الغواصتين مش موجودين بيقولك المثل اللى بعيد عن العين بعيد القلب احنا كده

قاللتى لا ما تزعلشي قولتاها لا انا مبسوط بس للاسف انا حزين مش زعلان انك بتكرمينى انا مبسوط انك كرمتينى على الاقل وزارة الثقافة افتكرتنا كنت انا وحامد فتوح وهى شهادة عطيتنى ايه شهاده وميدالية .

-         والله انا بريح بقى نفسي واقول ايه انا المجهود ده عملته عشان مصر وعشان البلد فمش عايز من البلد دى حاجه انا شيلت الموضوع ده من دماغى خلاص التكريم اللى اتكرم اتكرم وكل واحد بياخد حظه بقى وانا عملت اللى عليا والحمد لله

من بعد الحرب كان القوات المسلحه بتكرم كل اكتوبر ازاى شكلها ايه والنهارده شكله ايه مافيش خلاص الحرب بدأت تندثر سنتين ومش حتلاقى حد بيفتكرها لان الناس عددها بتقل فعلا كله من القياده ومن كل حاجه خلاص نسوا حيبدؤو ينسوا والحمد لله تحملناها وشيلناها والحمد لله ربنا وفقنا

طب بالنسبة للاجيال الجديدة الحالية الغواصات الجديدة التطور طبعا الحديث بقى الفرق بين الغواصة 22 والغواصه اللى استلموها دلوقتى اللى هى 209 دى انا اول واحد روحت اتعاقدت عليها سنه 84.

ايوه حقولك السبب ايه اتعاقدنا سنه 84 انا واللواء ياقوت هو رئيس العمليات والتدريب الله يرحمه ومعانا كام واحد خدونى انا كومندان غواصه هما قالوا محتاجين كومندان الغواصات   ذهبنا الى بعثة على مستوى الجمهورية بعثة من رئيس الجمهورية يعنى كان هو وانا طلبونى فى المانيا عايزين معاهم كومندان الغواصة فكنت انا اقدم كومندان غواصه وواخد احسن قائد 3 سنين متصله روحت انتى عارفه الناس الالمان عملوا معايا ايه

شالونى على دماغهم عشان ازاى انا كومندان غواصة 7 سنين انتى عارفه كومندان الغواصة بره بيعملوا معاه ايه

يعمل فى البحر 9 شهور وياخد باقى السنه اجازة للمحافظة على حالته الصحيه والنفسية انا حكيت لك الغواصه عبارة عن قبر متحرك اوكسجين قليل ده بيأثر على المخ طبعا وعلى خلايا المخ هوا مافيش ميه مافيش مش كويسه مش نضيفة انافى احد المرات شربت الجاز على انه ميه فى الغواصة من الارهاق حتى لم اكن شامم رحيتها بالنسبهالاكل ممكن ناكل نص الايام اكل جاف لان المطبخ مش عارف يشتغل فى البحر وعالى والحاجات دى مش عارف يشتغل و كان الاكل معظمة معلبات مش الاكل المتعارف علية

احنا بناخدوا اكل عادى عندنا تلاجات بس لما يكون البحر عالى او الامكانيات مش سامحه وغاطس تحت الميه مانا مش غاطس تحت الميه واشغل الفرن مش ممكن نموت ؟ فنضطر ناكل اكل معلبات واحنا على طول تحت الميه يبقى على طول اكل معلبات انا باكل 7 ايام معلبات وبقيه الشهر اخده اكل طازج لان بكتيرى اخد شهر لكن احنا معنداش فى مصر نظام بتاع بره اللى هو تشتغل 4 شهور وبقيه السنه قاعد انت شغال متواصل دا انا اجازتى السنوية العادية ما بخدهاش اه اومال ايه بقولك انا لما سافرت المانيا قالواله الراجل ده بقاله 7 سنين كومندان عندهم الكومندان يقعد 3 سنين ويتغير مافيش حاجه اسمها يقعد 7 سنين قالولى كده قولولى تقعد 7 سنين دى حاجه معجزة عندنا وكرمونى فى المانيا و كانوا طالعين بيا السما سايبين قائد لواء الغواصات ويجبونى انا حتى كان يجى اللواء اتفضل يا كومندان عايزنك يا اخويا مش عايزنى انا .

لما يبقى كومندان لا له وقت وبعد كده يطلع من الغواصة على البر بقى على المكاتب حسب هما ما يقرروا وحسب كفاءته واستمراره وهما اللى بيقرروا عشان كده هما سابونى 7 سنين

لا ماحدش قعد 7 سنين اما بالنسبة للغواصه 23 اللى كانت مع معايا كان القائد اسمة عاطف بعجرى ما هو قائد الغواصه 22 اللى انا كنت فيها انا مكنتش كومندان وقد ذكرت انى كنت ضابط طوربيد كان كومندنها مقدم اسمه محمد نصر الزناتى وقتها كنت انا برتبة رائد كنت لسه مترقى رائد لكن فى 73 كنت قائد الغواصه 22

ادار الحوار و مراجعه التفريغ : منال المغربى

تفريغ : احمد ابراهيم

 

Share

مـعـرض الـوثـائـق

مـعـرض الـفـيـديـو

Youtube

Cannot Connect to Youtube Server


Cannot Connect to Youtube Server
Cannot Connect to Youtube Server
Cannot Connect to Youtube Server
Cannot Connect to Youtube Server
Cannot Connect to Youtube Server
Cannot Connect to Youtube Server

   

 

  

زوار اليوم
زوار امس
زوار الاسبوع
زوار الشهر
اجمالى الزوار
2511
2705
20157
2511
34555444

معرض الصور

المتواجدون حاليا

40 زائر، ولايوجد أعضاء داخل الموقع

اتصل بنا

الراسل 
الموضوع 
الرسالة 
    
Click to listen highlighted text! Powered By GSpeech