Click to listen highlighted text! Powered By GSpeech
Get Adobe Flash player
بدأنا السنه الـ 15 معكم 2022/2008 **** #لان_لجيشنا_تاريخ_يستحق_أن_يروي **** ***** إنشروا تاريخنا وشاركونا في معركة الوعي **** تابعونا علي قناة اليوتيوب 900+ فيديو حتي الان **** تابعونا علي صفحات التواصل الاجتماعي** أشتركوا معنا في رحلاتنا لمناطق حرب أكتوبر **** يرجي استخدام خانة البحث
  • تعريف بالمجموعة و أعضاءها

     مؤسسة مؤرخي مصر للثقافه ( المجموعة 73 مؤرخين ) المشهرة برقم 10257 لسنه 2016  المجموعه 73 مؤرخين ، مؤسسه ثقافيه للتأريخ والابحاث التاريخيه نشأت عام 2008 - وهي عباره...

    إقرأ المزيد...

بطل الشهر

بطل الشهر /  العميد يسري عمارة 

 

 

الــصـفـحـة الـرئيسيــة

مقاتلون مجهولون تعرفهم السماء ج2

 

 

بقلم | نسمة سراج ----

كعادتهم كل يوم جمعة بيتجمع الاحفاد فى البيت الكبير عند جدهم وبيقضوا وقت لطيف وكله حكايات ممتعة وذكريات بيحكيها الجد لأحفاده . الجد كان من المحاربين القدامى اللى خاضوا معارك شرسة ضد العدو لحد معركة 73 .. وصادف يوم تجمُعهم ذكرى انتصارات اكتوبر وكانت فرصة للجد انه يحكى عن بطولات المقاتلين اللى عاصرهم او سمع عنهم وقت الحرب ويسترجع التاريخ عن تضحيات وبطولات اشبه بالمعجزات اللى يمكن عقل ملايين من الناس لحد دلوقتى مش قادرة تستوعبها ..ايوة احنا خوضنا حرب اشبه بمعجزة والعالم عارف ده

. ════════════

الجد : النهاردة ياولاد مناسبة عظيمة وانا سعيد ان يوم تجمُعنا صادف يوم 6 اكتوبر احد الاحفاد : ايوة بقى ياسى جدو جاتلك فرصتك تحكيلنا عن الذكريات والبطولات ابتسم الجد بفخر : انا لو فضلت أحكى مش هاقدر اوصفلكم ولو ربع البطولات والتضحيات اللى أتعملت علشان سيادتكم يكون ليكم وطن تعيشوا فيه بأمان أحد الأحفاد : احنا النهاردة ياجدو فى المدرسة عملنا احتفالية علشان ذكرى اكتوبر واتكلموا عن البطل ابراهيم الرفاعى وقالوا انه كان اسطورة بكل المقاييس الجد : أسطورة نادرة .. الشهيد العميد ابراهيم الرفاعى ..حطم كل قواعد المستحيلات اللى ممكن تتخيلها , كان قلبه قلب اسد محارب وكان فدائى من طراز فريد .وهو قائد المجموعة 39 قتال اللى كانت مربية الرعب للعدو ! تعرف كام عملية عملتها المجموعة دى تحت قيادته حوالى 81 عملية ومعظمهم اتقال انهم مستحيلين ! وكلها كانت عمليات خلف خطوط العدو ════════════

احد الأحفاد الأكبر سنا : تعرف ياجدو ان مواقع التواصل بدأت تتكلم عن ابطال اكتوبر وبدأوا يهتموا بالإنتصار العظيم انا ملاحظ ده وفيه بوست مهم اوى قرأته عن " ابطال ايلات " وذكروا اسم اكتر من بطل زى الرائد بحرى حسين جاويش واللواء نبيل عبد الوهاب والشهيد رقيب اول محمد فوزى البرقوقى وانه كان الشهيد الوحيد فى عملية ايلات ممكن تقولى معلومات عنهم ياجدو من فضلك الجد : عملية ايلات دى عاوزة تاريخ لوحدها .. الرائد حسين جاويش كان من ابطال لواء الوحدات الخاصة بالقوات البحرية وكان هو قائد المجموعة التانية فى عملية ايلات اللى نتج عنها اغراق السفينة هيدروما واعطاب السفينة داليا, واللواء نبيل عبد الوهاب كان مشارك فى عملية تدمير السفينتين وتدمير الرصيف الحربى لمياء ايلات وتدمير مجمع البترول الرئيسى لحقل بترول بلاعيم وهو البطل اللى عمل شىء كان سابقة من نوعها لما الرقيب اول محمد فوزى البرقوقى استشهد واصر انه يسحب جثمانه مسافة طويلة لأقرب شط علشان العدو مايستغلش ده اعلاميا ولانه كمان مااستحملش يتخيل صورة صديقه اللى كان متحمس للعمليه ان العدو يفتخر بقتله , والبرقوقى كان متطوع فى القوات البحرية وأخد ليسانس اداب وهو فى الخدمة من جامعة اسكندرية وانضم للوحدات الخاصة البحرية سنة 63 واستشهد فى العمليه .وطبعا ايلات ابطالها كتير وكل واحد فيهم كانت مهمته دقيقه واحتمالية الخطأ معناه ألغاء العمليه

! ════════════

الحفيد الكبير : قد ايه انا بحس بفخر كبير ياجدى لما بقرأ واسمع عن رجالتنا وتضحياتهم ايه العقيدة دى واليقين ده اللى يخليهم يقدموا على الموت بالجسارة دى ؟ الجد : الايمان .. حب الوطن من الايمان ياصغيرى , والدفاع عن شرف الوطن هو جهاد فى سبيل الله .. عقيدتهم حب بلادهم وفكرة الوطن اللى كان فيه شوية جهلة بيقولوا عليه حفنة تراب عفنة ! معذورين مايعرفوش حفنة التراب دى اتروت بدم مين وحصل عليها ايه .. ماقروش تاريخ ولا هايقروا

!! ════════════

احد الاحفاد : انا قرات كمان عن بطل دمرت كتيبته 63 دبابة للعدو .. فعلا ده ! الجد : ايوة .. البطل الشهيد رائد صلاح حواش .. الجدع , قاد الكتيبة 41 فهد ..للمجد , واشتبك مع مجموعة من دبابات العدو واتصاب بشظية اثناء المعركة , والكتيبة تحت قيادته دمرت فعلا 63 دبابه . وفيه كمان البطل الشهيد رائد عادل القرش هو كمان دمر 13 دبابة , كان قائد لسرية دبابات بالفرقة التانية بالجيش التانى وكمان شارك فى صد هجوم اللواء 190 مدرع اسرا000ئيلى بقيادة عساف ياجورى واستشهد وهو بيصد الهجوم . ════════════

احد الاحفاد : ابطال ممنوعين من النسيان .. ياه ياجدى لو كل العالم يعرف الحكايات دى ومايبقاش الابطال دول مجهولين ! الجد : هما حتى لو مجهولين فى الارض فهما معروفين فى السما , احنا طول ايام الحرب وقبلها ماكناش مهتمين مين يعرفنا كان كل اللى شاغلنا نحارب ونخلص بلدنا من الحِمل اللى كان كاتم على نفسها ونحققلها النصربفضل الله ..ولو ان دلوقتى بقى فيه ناس متخصصة تتكلم عن تاريخنا يعنى شوية بشوية مش هانبقى مجهولين وسيرنا هاتملى العالم

. ════════════

احد الاحفاد : امال ايه حكاية عملية ايلات المنسية دى ياجدى وليه سموها كدة ؟ الجد : عملية ايلات المنسية اتسمت كدة لانها ماخدتش نصيبها إعلاميا رغم انها من العمليات اللى اتسببت فى خسائر فادحة للعدو وقتها ومين كان بطلها ؟ كان الشهيد الرائد عصام الدالى واحد من رجالة المجموعة 39 قتال , سافر البطل الاردن وجاب صواريخ ضرب بيها ميناء ايلات العسكرى واحدث خساير مروعة سنة 69 واسشتهد 30 اغسطس 69 فى عملية نسف سقالة الكرنتينة

. ════════════

احد الاحفاد : مصر مابتطلعش إلا رجالة.. فعلا تضحيات اسطورية . الجد : فيه بطل من أبطالنا قدم تضحيات عظيمة اسمه الشهيد مقدم احمد حسين ابراهيم كان قائد لإحدى كتائب الدفاع الجوى وقدر يوقع 13 طيارة وكمان وقع 4 طيارات كانت ضمن سرب متجه علشان يضرب مقر اللواء سعد مأمون قائد الجيش التانى , واستشهد لما كان بيحاول ينقذ منصة الصواريخ بعد وقوعها فى حفرة وده كان فى 8 اكتوبر 73 اثناء الثغرة واخر حاجة قالها " انا كويس قوى روح لخالى وقوله يقول لأمى ولنهلة ولخالد يسامحونى علشان نسيتهم وافتكرت مصر " الحفيد الأكبر : قد ايه مصر غالية اوى ياجدى علشان يروح فداها كل الشجعان دول , ياريتهم كانوا عايشين كان نفسى اقابلهم اوى واقولهم انتوا ابطال عظماء ومصر عمرها ماهتنساكم على مر التاريخ . الجد : الابطال دول كانت مكافئتهم الجنة ياصغيرى .. ضحوا وادوا رسالتهم وفيه اللى بيكملوا الرسالة ومستمرين فى الحفاظ على الارض والشرف .. طبعا مااقدرش مااتكلمش عن البطل اللواء طيار مدحت زكى رحمه الله ده بطل له رصيد كبير اسقط 5 طيارات فى حروب الاستنزاف واكتوبر .وفى 15 يوليو 67 وقع طيارة ميراج وكان وقتها لسه ملازم تحت الأختبار حديث التخرج من الكلية الجوية .وهو راجع من الاشتباك وقوده خلص منه واصر على انه مايقفزش ويخسر الطيارة وهبط بيها على الطريق وهبطت الطيارة وده اتسبب له وقتها فى كسر فى العمود الفقرى . كان من الشجعان . احد الاحفاد : وفيه كمان الشهيد حسن عبد المنعم عبد اللطيف .. كان من ابطال الصاعقة الجد : ايوة كان بطل من ابطال قوات الصاعقة فى حرب اكتوبر وكان من ضمن المجموعات اللى بتشتغل خلف خطوط العدو فى منطقة ابورديس والممرات واستشهد 10 اكتوبر 73 وتم منحه نوط الجمهورية من الطبقة الثانية

════════════

أحد الاحفاد : بصراحة ياجدى انت حكيتلنا النهاردة عن بطولات عظيمة عمرنا ماهننساها الجد : اوعوا تنسوها لانها تاريخكم .. تاريخ البلد دى ماينفعش يتنسى ولازم يفضل يتحكى لكل جيل جاى علشان حرب الهوية ياولاد ..الحرب دلوقتى مابقتش بسلاح بقت بالكلمة وغسل العقل وتشويه التاريخ وصناعة مجد على حساب بطولات بلادنا ورجالتنا .تاريخ بلادكم امانة فى ايديكم ورسالة اوعوا تبطلوا توصلوها ..احنا حاربنا زمان ومهدنالكم الطريق علشان تكملوا انتوا .. وطنكم امانة ياصغارى ماتفرطوش فيها ابدا .. وانتهت جلسة الجد والاحفاد بعد وعد بلقاء جديد لإستكمال قصص وبطولات رجال الوطن

════════════

بقلم | #نسمة_سراج

                         

تنويه | المعلومات عن الابطال مصدرها المؤسسة الثقافية " المجموعة 73 مؤرخين

" الخميس 29 سبتمبر 2022

Share

مـعـرض الـوثـائـق

مـعـرض الـفـيـديـو

Youtube

Cannot Connect to Youtube Server


Cannot Connect to Youtube Server
Cannot Connect to Youtube Server
Cannot Connect to Youtube Server
Cannot Connect to Youtube Server
Cannot Connect to Youtube Server
Cannot Connect to Youtube Server

   

 

  

زوار اليوم
زوار امس
زوار الاسبوع
زوار الشهر
اجمالى الزوار
1534
8389
18549
34720
33112169

معرض الصور

المتواجدون حاليا

52 زائر، ولايوجد أعضاء داخل الموقع

اتصل بنا

الراسل 
الموضوع 
الرسالة 
    
Click to listen highlighted text! Powered By GSpeech